How do we live ?

مساء \ صباح الخير على الجميع , أولا حابة اعرف عن نفسي " ملاك الشهري طالبة طب وجراحة سنة رابع من جامعة ام القرى " حبيت اجمع اهم الأسئلة اللي دايم انسأل عنها في مجالي عشان الجميع يستفيد منها واللي حابين يدخلون هالتخصص يكون عندهم فكرة بسيطة , أتمنى انكم تستمعون 🙊🧡.

• كم النسبة المطلوبة عشان ادخل هالتخصص او كم كانت نسبتك في القدرات والتحصيلي ؟🤔

ببساطة جداً الطب ماله نسبة معينة لازم الشخص يجيبها عشان يدخله لان نسب القبول كل سنة تتغير على حسب شطارة الدفعة على مستوى المملكة وكل جامعة تختلف في طريقة حسابها للنسب , على العموم النسب المطلوبة تكون عالية لكن مو بشكل مبالغ فيه يعني لا تشيلو هم ابداً💓.

•     كيف كنتي تذاكرين وكيف كنتي تترجمين محاضراتك ؟🤔

صراحة اول سنة لي في الجامعة اللي هي السنة التحضيرية كنت جداَ متخوفة من فكرة اني اذاكر بالانقلش وكل شي بالانقلش , بديت اول سنة ولله الحمد وكنت اذاكر اول بأول وكنت فقط اترجم الكلمات اللي مو فاهمتها ابدددداً ما كنت اترجم كل شي لان هذا غلط لاني لو قعدت اترجم كل كلمة بيضيع وقتي تماماً وما راح اتعود اذاكر بالانقلش لكن كنت فقط اترجم اللي احتاجه , في السنة اللي بعدها لما تخصصت طب وجراحة كنت اكتب مع الدكاترة دايم وغالبا اسمع التسجيل واكتب الملاحظات اللي ابغاها على المحاضرة , مو دايم كنت احتاج افتح مراجع طبية لان دكاترتنا يقولون كل شي لكن في حالة اني ما فهمت على طول افتح اليوتيوب واكتب اسم المحاضرة واخذ فكرة بسيطة عنها ومثل ما قلت لكم أحيانا افتح مراجع ادور اللي احتاجه فقط.

•     هل مهارة الرسم مهمة في مجال الطب ؟😯

لا ابداً مو شي أساسي لكن اغلب الطلاب والطالبات يرسمون عشان يثبتون المعلومات بطريقة إبداعية لا اكثر ولا اقل 🙆🏻‍♀️

•     كيف كانت السنة التحضيرية معاك ؟🤔

مرة كانت سنة جمييييلة حرفياً , اذكر اول محاضرة دخلتها كانت كيمياء حيوية المهم خرجت منها وانا منهارة ماني فاهمة ولا شيء بمعنى الكلمة😭😂 , المهم كنت واقفة قدام جدار واسأل نفسي ليش دخلتي طب 💔؟ طيب كيف بتمشين فيه وانتي مو فاهمة ولا شي ؟ واسئلة كثيرة محبطة ! لكن في نفس اللحظة ربي ألهمني وسألت نفسي مرة ثانية كيف الدكاترة هذول وصلو للي هم فيه الحين وصارو عظماء ؟ اكيد انهم مرو بنفس اللحظة اللي مريت فيها لكن ما استسلمو ابداً وبالفعل ما استسلمت لنفسي بالعكس استجمعت نفسي مرة ثانية وشديت حيلي وجبت درجات عالية ولله الحمد وانا جداً ممتنة لذاك الجدار !

•     هل كنتي تروحين عند مدرس خصوصي ؟

ايوة كنت اروح وابداً ما كنت راح أوصل للي انا فيه الحين لولا الله ثم هم.

•     اول مرة دخلتي المشرحة كيف كان شعورك ؟

كان شعععور جدا مهيب ومخيف لكن بنفس الوقت كان حلو

•     الجامعة مختلطة ؟

لا

•     كيف تحسين الطب صعب ولا سهل ؟

السهل الممتنع , ما انكر انه أحيانا يكون صعب ومعقد لكن جدا ممتع وانا مرة مبسوطة اني في ذا المكان , غالبية الناس عندهم فكرة ان الطب جدا صعب ومستحيل احد يمشي فيه لكن فكرو فيها شوي لو كان جدا صعب هل بيكون فيه دكاترة بالدنيا ؟ لا . طيب  لو كان جدا سهل ؟ كان كل الناس صارو دكاترة. فهمتو علي ؟ كل شخص يقدر يخلق السهولة من الصعوبة والعكس لذلك هو يعتمد عليك وعلى تفكيرك ومقدار صبرك

•     عندكم رياضيات في الطب ؟

في جامعة ام القرى لا مافي لكن مدري عن الجامعات الثانية والله.

•     السنة التحضيرية تدرسونها قبل القبول بالكلية ولا كيف ؟

السنة التحضيرية هي السنة المشتركة اللي على أساسها تدخل التخصص اللي انت تبغاه سواء ( طب وجراحة , اسنان , مختبرات...)

•     هل لازم نكون مرة بيرفكت في الانقلش ؟

لا موضروري تكون مرة ممتاز لكن مهم انك تعرف وتقرأ انقلش عشان ما تتعب , صراحة لما كنت في الثانوي كنت في معهد بيرلتز سنة ونص او سنتين تقريباً ابدا ما احس اني استفدت كثير لكن لما دخلت التحضيري صرت مجبورة أتكلم مع الدكتورات بالانقلش لان معظمهم أجانب ولما تخصصت صارو حتى الدكاترة السعوديين يتكلمون معانا انقلش ومرة صرت بيرفكت الحمدلله , يعني كل شي يجي بالتدريج لا تشيلو هم .

•     ايش المواد اللي درستوها في التحضيري ؟

الترم الأول : كيمياء حيوية , فيزياء طبية , علم الوراثة , حاسب , انقلش.

الترم الثاني : كيمياء حيوية 2 , علم وظائف الخلية , انقلش طبي , برمجة , مهارات التعلم.

•     كيف تعلمتي انقلش ؟

صراحة انا من صغري كنت اعلم نفسي ومرة كنت احب اتابع أفلام ومسلسلات وهي اللي علمتني اكثر من أي شي وبعدها دخلت معهد بس ما استفدت منه كثير زي ما علمت نفسي لكن لما تخصصت في الطب صرت مجبرة أتكلم انقلش طول الوقت والحمدلله

•     ليش تتحجبون في الجامعة ؟

عشان المبنى اللي تدرس فيه , فيه دكاترة ويدخلون في أي وقت عشان كذا لازم نتحجب دايم في المبنى هذا.

•     ايش الشي اللي لازم أكون متقنته عشان ادخل هالتخصص ؟

الصبر ثم الصبر ثم الصبر لان مشوار الطب مو هين ابدا لكنه في المقابل جدا ممتع وحلو + لازم تكونو تعرفو انقلش شوي مو ضروري تكونون فنانين مرة لكن مهم انكم تعرفو تقرأو

•     ايش اصعب شي واجهك خلال دراستك ؟

فيه أشياء كثير واجهتها أولا كانت فكرة دخولي للجامعة واني بصير انسانة مسؤولة عن نفسي تماما ثانيا، مرة كنت شايلة هم الدراسة بالانقلش وكنت اقرأ تجارب الناس واحسني أخاف زيادة فقررت من وقتها اني اصنع تجربتي بنفسي واغلط واتعلم من نفسي . ثالثا، فكرة اني بذلت جهد جدا كبير في السنة التحضيرية واني كرست هذي السنة لدراستي تماما عشان بعدها اتخصص في المجال اللي احبه وبالفعل ضغطت على نفسي لاني سمعت مقةلة من الدفعات اللي اكبر مني كانو يقولون " اعطي التحضيري سنة من عمرك وراح تعطيك العمر كله" وبالفعل اعطتني شي جداً قيّم بالنسبة لي.

•     هل انعزلتي عن اهلك ؟

بدون مبالغة انعزلت عنهم شوي وهم مقدرين وضعي ودراستي وحياتي كلها لكن في المقابل ترا اللي يتابعني يعرف اني دايم اطلع الحمدلله وما احرم نفسي من شي ابداً.

•     كيف وصلتي للي انتي فيه الحين ؟

كنت مرة اهتم بدراستي وكنت احب نفسي واكره اني أكون جاهلة في شي ابداً كنت محافظة على حياتي الاجتماعية والدراسية والسبب الأهم اللي خلاني أوصل للي انا فيه الان هو دعوات امي وجدتي واهلي بشكل عام لي ولولا الله ثم هم ما كان وصلت للي انا فيه الان وكنت دايم اتوكل على الله في جميع اموري وارضى بالقليل حتى لو انه ما اعجبني لاني كنت على ثقة تامة ان ربي راح يعوضني بالافضل دائماً.

ببدأ أتكلم عن تجربتي من السنة التحضيرية الى السنة الرابعة *..

اول ما دخلت الجامعة كانت مادة فيزياء طبية وهي اول محاضرة وصلت متأخر وكنت خايفة انطرد لكن لما دخلت رحبت فيني الدكتورة وعرفتني بنفسها وخلتني اعرف بنفسي قدام بنات شعبتي مرة كانت لطيفة وحسستني بالأمان جداً المهم انتهى اليوم الأول على خير والاسبوع الأول والشهر الأول كنت دايم اذاكر باستمرار اللي اخذته على مدار اليوم بعدين اراجع نهاية الأسبوع واطلع مع اهلي او احضر حصص مع مدرسيني يعني على حسب جدولي المهم اني جدا استفدت من مذاكرتي اليومية لما جات الاختبارات النصفية وعدت الاختبارات على خير وطلعت الدرجات وكانت درجاتي كويسة الحمدلله وجات بعدها بفترة الاختبارات النهائية وانتهينا من الترم الأول في السنة التحضيرية على خير .

الترم الثاني كان جداً ممتع واخف وتعلمت أشياء كثير كنت اغلط فيها بالترم الأول وعديت الحمدلله ووصلت لين نهاية السنة وطلعت الدرجات لكن كنت حاطة يدي على قلبي لين تطلع التخصصات ، مرة كنت أتمنى ادخل طب وجراحة لانه تخصص متفرع جدا وممتع ومو روتيني ابدا عدت الأيام وخلنا رمضان وانتصف رمضان وماجات الرسالة اللي كنت اتمناها لين ذاك اليوم اللي صحيت فيه على الساعة 4:38 في عصر رمضان فتحت عيوني ومسكت جوالي واشوف رسالة من جامعة ام القرى "مبرووووككككك ! تم تخصيصك في الطب والجراحة" لاشعوريا شهقت ودمعت وحمدت ربي وسجدت شكر له ورحت ابشر اهلي وصارو يقولون خلاص صرتي الدكتورة ملاك كان شعور ما ينوصف ابداً لاني كنت على ثقة تامة ان ربي ما راح يخيب ظني ابدا ولا راح يضيع جهدي.

بديت السنة الثانية وجاء اول يوم اداوم فيه وانا متخصصة ووعدت نفسي هذي السنة اني راح ابني أشياء كثير فيني وراح اترك بصمتي وبالفعل داومت اول يوم ورشحت نفسي انا وخمسة بنات اني امسك الليدرية "الليدرية هي اني أكون قائدة لدفعتي وانا أكون ممثلة لهم اسمع لجميع شكاويهم واوصلها لكلية الطب باسم دفعتس وكنت ارتب مواعيد المحاضرات واشياء كثير جداً لا تعد ولا تحصى " المهم تم الوقوع بالاختيار علي وصرت ليدر دفعتي من ذاك اليوم جداً ممتنة لدفعتي لاختيارهم لي وهم مايعرفوني ابداً. المهم داومنا اليوم الثاني واقسمنا قسم الطبيب وانا اكرر القسم دمعت عيني من هول القسم وعظمته كانت لحظة لا تُنسى ابداً.

طبعا واجهت صعوبات جدا كثير في هذي السنة بحيث انها كانت اول سنة لي في التخصص وأول مرة امسك مسؤولية وكانت امانة في رقبتي المهم اني تعلمت أشياء جدا كثير حاولت اسيطر على وقتي بحيث اني اذاكر واخرج وانبسط وبنفس الوقت ألبي احتياجات دفعتي وانسق لهم كل شي واتوصل مع الدكاترة وما الى ذلك.

نجي لموضوع المذاكرة هذي السنة جربت جميع  أنواع المذاكرة حرفيا جربت اذاكر على الجهاز وجربت على الورق وجربت اكتب بنفسي مع الدكاترة وجربت اذاكر من اليوتيوب لين نهاية السنة وانا اجرب واغلط واتعلم لين بديت سنة ثالث وانا اتعلم بعد ووصلت لطريقة مذاكرة بطلة اللي هي :

• اول شي اخذ المصحف واقرأ صفحتين على الأقل، ليش ؟ أولا لاني مختمة القران وما ابغا أكون هاجرته ابداً ثانيا بنية التوفيق من الله سبحانه وتعالى وحرفياً دايم احس صدري ينشرح وانجز اكثر.
• ثاني شي افتح المحاضرة وامشي عيني عليها عشان اخذ فكرة عنها
• ثالث شي افتح اليوتيوب واكتب اسم المحاضرة وافتح فديو واتابعه عشان اخذ فكرة اكثر عن الموضوع
• رابع شي ابدأ اذاكر المحاضرة زين واكتب الملاحظات المهمة واذا احتجت افتح مراجع واضيف معلومات زيادة
• اخيراً اذا خلصت المحاضرة قبل ما اقفلها اراجعها على السريع عشان ما انساها وبس والله.

سنة ثانية نزلنا المستشفى 4 مرات في كل نزلة كنت اتعلم شي جديد مرة كان الشعور حلو لما اروح المستشفى كـ دكتورة مو كـ مريضة وكانت فيه فعاليات ثانية في الكلية يعني مو بس دراسة ونزلات مستشفى كنت دايم اروح حملات تطوعية عشان اطور من ذاتي وافيد غيري واخذ شهادات وابني السي في حقي.

الكلية كانت تسوي رحلات دايم مع دكاترتنا مرة مرة تجننن صدق يعني بالمختصر حياتي كطالبة طب ما اقتصرت على الدراسة فقط بالعكس انا جداً سعيدة ولله الحمد.

عشان كذا انا بوجه رسالة لكل شخص يتمنى يدخله لكن خايف من التخصص ومن كلام الناس " كل شخص بالدنيا هذي ربي ميزه بقدرات كل شخص بالدنيا هذي عنده قوة تحمل وصبر غير عن الناس الباقية عشان كذا لا تحبسون أنفسكم وتكبتونها عشان كلام الناس ! ترا الشخص لما يخوض التجربة بنفسه غير لما يسمعها من شخص ثاني ، دايم أقول اكبر غلط ممكن تقترفه بحق نفسك انك تقارنها بغيرها ! ايوة جربو بنفسكم وبعدين احكمو ابداً لا تحطو لانفسكم قيود دايم خليكم محلقين في السماء وكونو على يقين تام ان ربي ما حطكم في هذا الطريق ووصلكم له الا انه الوحيد العالم بقدراتكم لذلك لا تظلمو أنفسكم ابداً. الطب يحتاج له صبر وطولة بال لان بتجي أيام ثقيلة جدا ومتعبة ومرهقة لكن كل شي يعدي ، اليوم نبكي ؟ بكرة نضحك ! اليوم نحزن ؟ بكرة نفرح . 

"وتمضي الحَياة"

اختكم ملاك الشهري

Insta + snapchat : meek_111